Reikningar frá okkur eru alfarið á rafrænu formi og kröfur birtast í heimabankanum þínum um það bil viku eftir mánaðamót. Þú getur skoðað reikningana þína, greiðslustöðu og hreyfingaryfirlit á þjónustuvefnum. Einnig er hægt að skoða reikninga í Símaappinu og fá afrit send með tölvupósti í hverjum mánuði.
Hvar finn ég reikningana mína?
Þú getur skoðað reikningana þína á minn.siminn.is.
- Skráðu þig inn á Þjónustuvefinn.
- Veldu Reikningar efst á síðunni.
- Veldu tímabilið sem þú vilt skoða.
- Smelltu á Skoða við viðkomandi reikning til að opna hann á PDF-formi.
Í reikningayfirlitinu sérðu meðal annars reikningsnúmer, upphæð, gjalddaga og hvort reikningurinn sé greiddur.
Þú getur einnig smellt á Sækja hreyfingaryfirlit á sömu síðu til að fá hreyfingayfirlit fyrir valið tímabil.
Mikilvægar dagsetningar
Dagsetningar á reikningum geta verið ruglandi, en hér er það sem þú þarft að hafa í huga:
- Útgáfudagur er dagsetningin sem reikningurinn er gefinn út, en ekki endilega dagurinn sem krafan birtist í heimabankanum. Notkun og gjöld eftir útgáfudag birtast á næsta reikningi. Ef þú leigir til dæmis bíómynd í Síminn Bíó þann 1. mars getur hún komið fram á reikningi í byrjun apríl.
- Gjalddagi er viðmiðunardagur greiðslu og er alltaf 20. hvers mánaðar.
- Eindagi er síðasti dagur til að greiða reikninginn áður en dráttarvextir og mögulegur innheimtukostnaður geta bæst við.
- Fyrir einstaklinga er eindagi 2. næsta mánaðar eða næsti virki dagur.
- Hjá fyrirtækjum er eindagi 30. hvers mánaðar.
Ef reikningurinn er greiddur eftir eindaga reiknast dráttarvextir frá gjalddaga.
Innheimta
Ef reikningur er ógreiddur eftir eindaga fer hann í innheimtuferli með tilheyrandi kostnaði samkvæmt 1. gr. reglugerðar nr. 133/2010. Á eftirfarandi skýringarmynd má sjá innheimtuferlið í heild, en allar dagsetningar miðast út frá eindaga reiknings:
Innheimtuferlið er hægt að brjóta niður í þrjár tegundir aðgerða: Viðvaranir, lokun þjónustu og loks lögfræðiinnheimtu.
Nærðu ekki að greiða fyrir eindaga?
Við bjóðum upp á ýmis greiðsluúrræði. Hafðu samband við þjónustuverið okkar og við leysum málið saman!
Viðvaranir
Við sendum viðvaranir með tölvupósti á netfang og/eða bréfpósti á lögheimili einstaklinga, en fyrirtæki fá þær sendar með bréfpósti á skráð heimilisfang. Þú getur einnig fundið þessar viðvaranir í rafrænum skjölum í netbanka undir heitinu Síminn - Innheimtubréf.
Tveimur dögum eftir eindaga sendum við innheimtuviðvörun til að minna þig á ógreiddan reikning og fyrirbyggja kostnaðarsamar innheimtuaðgerðir. Ef reikningurinn er enn ógreiddur sendum við þrjár áminningar með milliinnheimtubréfi.
28 dögum eftir eindaga fá einstaklingar SMS viðvörun um yfirvofandi lokun á þjónustu ef þau eru með skráð tengiliðanúmer. Fyrirtæki fá sömu viðvörun senda með bréfpósti.
Bæði innheimtuviðvörun og milliinnheimtubréf eru gjaldfærð samkvæmt verðskrá.
Lokun þjónustu
Ef reikningur er enn ógreiddur eftir 33 daga er lokað fyrir allar ógreiddar þjónustur. Ógreiddir farsímar geta enn móttekið símtöl, en öll önnur þjónusta verður ónothæf. Þú getur haft samband við þjónustuverið til að opna tímabundið fyrir þjónusturnar þínar gegn gjaldi samkvæmt verðskrá.
Ef reikningur er enn ógreiddur eftir 63 daga er lokað aftur fyrir allar þjónustur sem hafði verið opnað fyrir. Ógreiddir farsímar geta þá hvorki hringt né móttekið símtöl.
Ef reikningur er ógreiddur eftir 76 daga er öll þjónusta aftengd varanlega. Til að endurvirkja þjónustuna þarf að greiða alla útistandandi reikninga og panta hana aftur, eins og um nýja þjónustu væri að ræða.
Lögfræðiinnheimta
Ef reikningur er ógreiddur eftir 81 dag er hann sendur í innheimtu hjá þriðja aðila. Aðkomu Símans lýkur þar með og þú þarft að gera skuldina upp við innheimtuaðilann.
Greiðsluleiðir
Við bjóðum upp á eftirfarandi greiðsluleiðir:
- Boðgreiðsla þar sem reikningurinn er greiddur sjálfvirkt með greiðslukorti og ekkert færslugjald leggst á. Þú getur skráð þig í boðgreiðslur í Símaappinu eða á gamla þjónustuvefnum.
- Beingreiðsla þar sem reikningurinn er greiddur sjálfvirkt af bankareikningnum þínum. Færslugjald leggst á við stofnun kröfu í bankanum. Þú getur skráð þig í beingreiðslur í heimabankanum.
- Handvirk greiðsla í heimabanka þar sem krafa birtist í heimabankanum í byrjun hvers mánaðar þú greiðir kröfuna handvirkt í heimabankanum. Færslugjald leggst á við stofnun kröfu í bankanum.
- Stök kortagreiðsla þar sem þú getur greitt stakan reikning með greiðslukorti í Símaappinu.
Ekki er hægt að greiða reikninga með venjulegri handvirkri millifærslu.
Hvað er færslugjald?
Færslugjald, stundum kallað útskriftargjald, er gjald vegna útgáfu reiknings í heimabanka eða með skeytamiðlun.
Boðgreiðslur bera ekki færslugjald. Nánari upplýsingar um gjöld vegna reikninga er að finna í verðskrá Símans.
Reikningurinn er hærri en ég átti von á!
Reikningurinn getur hækkað vegna nýrrar þjónustu, gjaldskyldrar notkunar eða breytinga á afsláttum. Best er að bera reikninginn saman við reikning fyrri mánaðar til að sjá hvað hefur breyst.
Ný þjónusta eða búnaður
Ef þú hefur nýlega bætt við þjónustu eða búnaði getur það hækkað reikninginn. Skoðaðu hvort nýr gjaldaliður hafi bæst við eða hvort Fjöldi sé hærri en áður.
Fyrsti reikningurinn getur verið hærri
Ef þú ert nýr viðskiptavinur eða hefur bætt við þjónustu í miðjum mánuði getur sami reikningur innihaldið mánaðargjöld frá þeim degi sem þjónustan var stofnuð ásamt gjaldi fyrir næsta mánuð.
Þá getur reikningurinn verið hærri en venjulegt mánaðargjald án þess að um tvírukkun sé að ræða.
Gjaldskyld notkun
Notkun er almennt rukkuð eftirá og getur því komið fram á reikningi næsta mánaðar.
Dæmi um gjaldskylda notkun eru:
- Keypt eða leigt efni í Sjónvarpi Símans.
- Gjaldskyld farsímanotkun erlendis.
- Símtöl í erlend númer.
- Önnur gjaldskyld notkun sem fellur utan innifalinnar þjónustu.
Notkun getur einnig birst án aukagjalds. Skoðaðu dálkinn Til greiðslu til að sjá hvort einstök notkun hafi hækkað reikninginn.
Afsláttur hefur breyst eða fallið niður
Ef afsláttur breytist eða fellur niður getur reikningurinn hækkað þótt þjónustan sé óbreytt. Skoðaðu því bæði gjöld og afslætti þegar þú berð saman reikninga.
Hvernig sé ég hvað breyttist?
Þú getur borið saman reikninga á Þjónustuvefnum.
Er villa á reikningnum?
Ef þú sérð þjónustu, notkun eða annan gjaldalið á reikningnum sem þú kannast ekki við skaltu hafa samband við þjónustuver Símans. Við athugum málið og leiðréttum reikninginn ef mistök hafa átt sér stað.
Hvernig skrái ég mig í boðgreiðslur?
Skráning í boðgreiðslu er alfarið í sjálfsafgreiðslu. Þjónustuverið okkar getur ekki tekið við greiðslukortaupplýsingum í gegnum síma eða á netspjallinu.
Skráning fyrir einstaklinga
Þú getur skráð reikningana þína í boðgreiðslur í Símaappinu.
Skráning fyrir fyrirtæki
Til að skrá fyrirtæki í boðgreiðslu þarftu að skrá þig inn á gamla þjónustuvefinn.
- Veldu Skipulag → Reikningar í boðgreiðslu efst á skjánum.
- Hakaðu við Skrá reikninga í boðgreiðslur.
- Fylltu út greiðsluupplýsingar og smelltu á Vista.
Aðrar algengar spurningar um reikninga
Get ég fengið reikninga með skeytamiðlun?
Já. Ef þú vilt fá reikninga senda með rafrænni skeytamiðlun skaltu senda tölvupóst á siminn@siminn.is. Þú þarft ekki að taka fram hvaða skeytamiðlara á að nota.
Get ég fengið reikninga senda í tölvupósti?
Já. Ef þú vilt fá reikninga senda í tölvupósti getur þú kveikt á því í Símaappinu eða á gamla þjónustuvefnum
- Stillingar -> Þínar stillingar
- Hakaðu við Fá fjarskiptareikninga í tölvupósti.
- Smelltu á Vist