Ef farsíminn þinn týnist eða þig grunar að honum hafi verið stolið getum við læst símanúmerinu þínu tímabundið og rakið hvort einhver sé að nota símann þinn með öðru símanúmeri. Athugaðu að við getum ekki rakið staðsetningu tækisins.
Læsa símanúmeri
Ef þú vilt láta læsa símanúmerinu þínu skaltu hafa samband við þjónustuverið okkar. Þegar númerinu er læst þarf að velja 4 stafa öryggisnúmer sem er notað þegar á að opna númerið aftur. Með læsingu er lokað fyrir alla notkun á SIM kortinu þínu, sama hvort það séu símtöl, SMS eða gagnanotkun.
Utan afgreiðslutíma getur þú hringt í síma 550 9200 og lesið inn skilaboð um hvers vegna þú vilt læsa símanúmerinu þínu ásamt því að taka fram kennitölu, símanúmer og 4 stafa öryggisnúmer sem þarf að gefa upp við aflæsingu.
Því miður getum við ekki læst farsímanum sjálfum, þannig að ef þú ert ekki með stillta skjálæsingu gæti ópruttinn aðili enn komist í öppin þín og skilaboðasögu. Ef síminn þinn er tengdur við skýjaþjónustu eins og iCloud eða Google getur þú skráð þig þar inn og læst símanum í gegnum netið.
Ertu með rafræn skilríki?
Rafræn skilríki á SIM kortinu eyðast ef símanúmerinu er læst og þú þarft að setja upp ný rafræn skilríki í kjölfarið. Þetta á þó ekki við um rafræn skilríki í Auðkennisappinu.
Aflæsa símanúmeri
Þegar þú hefur fundið farsímann þinn og vilt láta opna aftur fyrir það skaltu hafa samband við þjónustuverið okkar eða koma í næstu verslun Símans.
Athugið að gefa þarf upp öryggisnúmerið sem var valið þegar númerinu var læst.
Rekja farsíma
Ef símanum þínum var stolið og þú vilt láta rekja hvort einhver sé að nota símann með öðru símanúmeri þarftu fyrst að tilkynna þjófnaðinn til lögreglu og mæta með lögregluskýrslu í verslun Símans. Við bjóðum eingöngu upp á rakningu fyrir farsíma sem eru með skráða þjónustu hjá okkur og rakning er gjaldfærð samkvæmt verðskrá.